今晚意甲前列大战，拿玻里主场硬撼罗马，目前排第3嘅拿玻里同「米兰双雄」争标形势非常紧凑，1分都不能少，趁主场必抢攻争胜。罗马喺欧协联大胜晋级4强，士气高昂，加上仲有机会争夺前4席位，无惧驳火。拿玻里近4场总入球全开3球或以上，首选中位数2.5球嘅入球大。（Now 638周二凌晨1时直播）

拿玻里喺2月欧霸盃出局後，专注番踢联赛，近6场意甲赢咗4场，包括击败两支强队拉素及阿特兰大，现时少踢一场落後榜首ＡＣ米兰5分，争标仲有价讲，但已经冇乜失分空间。呢支南部劲旅防线并唔稳阵，上仗主场对费伦天拿失咗3粒，搞到以2比3败阵。值得一提佢哋近期「客强主弱」，作客3连胜，但近4仗主场反而输咗3场，面对来势汹汹嘅罗马，想保住清白身并非易事。

罗马目前落後第4位嘅祖云达斯6分但少踢一场，为争前4亦要豁出去，呢支首都「雌狼」状态甚弗，近6场联赛取得5胜1和，上场欧协联更以4比0大炒波杜基林特，「新托迪」尼高路辛尼奥路大演帽子戏法，「谭仔」谭美阿巴谦亦入波，呢位英格兰国脚今季各项赛事已轰入24球，配合埋罗伦素柏历坚尼及米希达利恩等进攻好手，罗马锋线相当锐利，有力撕破拿玻里防线，入球骚走唔甩。