曼联早前联赛主场以3比2险胜诺域治，最大功臣当然系C朗拿度，依名葡萄牙射手除咗个人连中三元，激活咗合约中嘅奖励条款，袋走85万镑之外。赛前仲畀镜头影到佢逐一鼓励队友，令唔少球迷都认为，比起後衞哈利马古尼，佢先系担任队长嘅最佳人选。

C朗拿度今年回归曼联後，成为球队首席射手，对诺域治嘅比赛上演帽子戏法後，今季各项赛事已经射入21球，更成功激活合约中嘅奖励条款。首先一季射入20球可以拎到75万镑，加上帽子戏法额外获得嘅10万镑，令C朗踢完上场比赛之後，即刻独取85万镑，相当和味。另外合约中写明C朗喺达到20球里程碑後，只要每次入多一球，就可以再袋多10万英镑，「红魔鬼」今季仲有6场比赛，相信C朗要再入波应该无咩难度。

除此之外C朗拿度场外亦发挥出好大作用，有镜头影到依名37岁老将，赛前喺球员通道逐一鼓励队友，当中仲包括队长哈利马古尼，令唔少球迷质疑，C朗先系担任球队队长嘅最佳人选。多位曼联球迷喺社交网站留言道：「一於给予队长臂章C，他是我们今季唯一正能量来源。」、「这就是为甚麽要让C朗成为队长的原因！」、「领导才能不一定要有队长臂章才能展现出来。」