上周六（16日）热刺「倒灶」0:1不敌白礼顿，错失坐稳前4嘅机会。事後射手哈利卡尼更畀人发现早几日佢飞咗过去美国睇Golf比赛，仲畀维拉名宿艾邦拉贺寸佢：「佢踢到好似未适应时差咁！」

热刺本来就以57分位处第4位，只要赢波就可以拉开同曼联以及阿仙奴嘅领先距离，不过偏偏最终主场0:1输畀白礼顿，错失大好良机。热刺全场更只录得5脚射门，仲要一脚都唔中龙，前线球员包括哈利卡尼成为众矢之的。

事後呢位英格兰国脚更被人翻旧帐，原来佢喺再上一周赢完阿士东维拉後，就即刻飞咗去美国睇高尔夫球大师奖，对白礼顿前先急急脚飞番嚟，赛前分晒心，难怪表现失晒准。

当日担任电台节目嘉宾嘅前维拉名宿艾邦拉贺，就明寸哈利卡尼表现「踢到好似有时差咁」：「我系卡尼嘅Fans，但如果你去美国睇波返嚟後踢到好似今日咁，呢个问显一定要问佢：你呢个系咪一个正确决定？因为热刺就好似一只无牙老虎咁，冇一脚射门中龙。」

的而且确，喺争逐前4嘅道路上，热刺一分都不能少，今场竟然输畀一支中游球队，等於「让4」畀曼联同阿仙奴等球队。「每一次佢哋好似有机会争到前4，却自己放弃机会。」艾邦拉贺话。