利物浦今季攻力冠绝英超，全赖阵中有6位前锋穆罕默德沙拿、沙迪奥文尼、罗拔图法明奴、祖亚高祖达、路尔斯戴亚斯、奥历治帮手，虽然表面上似有人满之患，但会方希望一直保留呢条梦幻锋线，除咗积极争取同沙拿续约之外，近日亦准备同法明奴倾续约问题，令「埃及文明」延续落去。

罗拔图法明奴2015年由贺芬咸加盟红军以来，一直系球队主力，虽然呢位巴西国脚已经年届30岁，加上近年入球数字偏低，今季英超上阵18次只入5球，演出唔及沙拿、文尼、祖达抢眼，但会方认为法明奴喺锋线负责「开路」及二传工作，对球队贡献非常大，角色独特，队内冇人可以代替佢嘅作用。呢位「忠臣」将於明年夏天约满，利物浦管理层认为有必要今夏就同佢完成续约工作。

另外，罗拔图法明奴因伤缺阵上场英超对曼联之後，近日已经复操，有望复出踢周日(24日)晚「默西赛德郡打吡」主场对爱华顿。