曼联队长哈利马古尼收到炸弹恐吓，警方正在调查中，对於案件起因，其实大家心知肚明，《曼彻斯特晚报》分析评论认为，马古尼喺「双红会」前访问嘅言论，有侮辱球迷之嫌，激嬲球迷所致。

先回顾佢喺「双红会」前嘅言论，佢话：「我认，今季我有时踢得好差，但如果我每场都咁差，就唔会每场都正选上阵，两任领队每场畀我踢正选，系有原因嘅，因为我为球队带来贡献，不过我都明白，我系队长，又使咗球会咁多钱，当球队表现唔好，失好多波，我会受到批评。」

呢番说话表明，马古尼不断为自己辩护，唔肯自我检讨，加上佢去年11月为英格兰入波後，用手兜住耳仔听嘘声来回应批评声音，证明佢唔肯接受批评，之後表现愈见差劲，无疑令球迷嘅愤怒火上加油，再加上呢番言论，对球迷系一种侮辱。

依家收到炸弹恐吓，犯案凶徒当然系唔应该，但马古尼都要认真反省自己嘅过失，接受批评先系正确处理方法。