车路士即将落实卖盘结果，英国《天空体育》爆出F1「车神」咸美顿同美国网球巨星S威廉丝，同财团集资提出收购「蓝战士」，呢单收购嘅「明星效应」相当显着，不过咸美顿嘅阿仙奴球迷身份深入民心，连佢嘅「死敌」麦斯韦斯塔本都忍唔住寸爆：「阿仙奴球迷收购车路士咁有趣？」

据报咸美顿同S威廉丝，过去几个星期同马田布劳顿领导嘅英国财团接洽，消息指两位巨星会各自集资1,000万镑，加入该前利物浦主席及前英航主席嘅财团，虽然呢个数字只占25亿镑收购计划嘅小部份，但系如果马田布劳顿接纳2人兼且顺利中标，咸美顿同S威廉丝就会成为车路士股东之一。

呢个计划曝光後引嚟唔少回响，尤其系咸美顿嘅身份相当尴尬，呢位7届F1总冠军一直系另一伦敦球会阿仙奴球迷，过去多次公开表示自己系「厂迷」，唔单止有阿仙奴嘅纹身，2015年更曾经披起阿仙奴波衫踢慈善赛，依家突然走去收购车路士令人搲爆头。

对於咸美顿嘅举动，佢死对头麦斯韦斯塔本亦睇唔过眼：「我本身系燕豪芬球迷，所以永远唔会收购阿积士，如果我要买球会就要话晒事，唔会只系买少少股份。乜咸美顿唔系阿仙奴球迷咩？一个阿仙奴球迷收购车路士真系好有趣，每个人都可以决定点用自己啲钱，大家就放长双眼睇下个结果。」