曼联周四(21日)宣布荷兰教练坦哈格下季接掌帅印，不过教练团人选仍未有定案。据英国传媒报道，坦哈格嘅「左右手」人选，除咗阿积士嘅副手云达加治外，前英格兰国家队主帅麦卡伦亦会回巢，佢曾经喺99年至01年担任费格逊副手，更系坦哈格嘅「师傅」之一，搵佢返嚟最合适不过。

英国《每日邮报》报道，坦哈格同曼联达成协议，不过教练团人选未有共识，坦哈格希望请云达加治同麦卡伦出任副手，但曼联就想佢先检视现有教练团人选，包括曾任费格逊副手嘅费伦，以及兰历克引入嘅岩马士等等。据报坦哈格坚持自己嘅选择，预计曼联亦会同意作出让步。

曼联目前仍就云达加治嘅合约同阿积士谈判，预料问题唔大，两人可望喺曼联再度合作。坦哈格初登英超，亦需要一个熟悉英格兰足球同曼联嘅人作为「盲公竹」，60岁嘅麦卡伦就系佢心水人选，呢位前英格兰主帅08年执教荷甲川迪，坦哈格就系佢助手之一，而且麦卡伦曾经喺99年至01年做过2年曼联助教，对「红魔鬼」有一定认识。