啱啱宣布获坦哈格下季执教嘅曼联，内乱问题仍然严重，队长哈利马古尼周三(20日)收到炸弹恐吓，有狂徒声称喺佢嘅大宅内放置炸弹，吓到呢位英格兰国脚即时报警。警方带同警犬去马古尼豪宅内搜查未有发现，相信只系「靠吓」。据报恐吓信内容有对马古尼人身攻击，怀疑系不满佢近期表现嘅激进曼联球迷所为。

曼联上场联赛惨吞利物浦4蛋後，29岁嘅马古尼收到一封恐吓电邮，信入面话佢喺柴郡嘅400万镑豪宅内已被放置炸弹，虽然马古尼过往收过唔少球迷嘅恐吓信，但今次讲到「放炸弹」事态严重，所以报警求助。警方即时派人到场搜查但未有发现，周四(21日)再派警察带同警犬第2度搜索，同样无所获，相信炸弹袭击只系虚报。

马古尼同未婚妻Fern Hawkins以及2个女同住，据报恐吓电邮矛头指向该曼联中坚，警方调查指狂徒可能系唔满意佢表现嘅曼联球迷。消息人士向英国《太阳报》表示：「马古尼唔会因为呢啲恐吓而离开曼联，家人嘅安全当然系佢优先考虑，但以佢嘅坚强性格，可以应付呢啲丑陋嘅球迷。」

马古尼今季表现一直受到批评，早前为英格兰国家队出赛亦被球迷狂嘘，唔少人认为佢8,000万镑嘅转会费同场上表现唔成正比。据报马古尼未有受事件影响，如常操练备战周六(23日)晚作客阿仙奴嘅英超大战。