菲腊比古天奴今年1月回归英超，以借用身份由巴塞隆拿加盟阿士东维拉，初期表现系威系势，频频入波同助攻，但原来只系虚火，呢位29岁巴西国脚近5场上阵踢到隐形，冇入波亦冇助攻，维拉领队谢拉特可能会打消今夏买断呢位前利物浦队友嘅念头。

菲腊比古天奴为阿士东维拉头8场上阵，有4球进帐，包括首仗披甲射入曼联大门，但近期表现每况愈下，上场对李斯特城，上阵79分钟只有24次触球，并冇射门，甚至连具威胁传球都冇，仲有8次失去控球权，表现非常差。

原本阿士东维拉有意今夏买断古天奴，巴塞要求4,000万欧元转会费，令维拉却步，更何况古天奴依家已打回原形，维拉更加唔会买断佢，预料古天奴下季又要返回巴塞坐冷板。

其实除咗古天奴状态走下坡之外，维拉整体表现亦未如理想，早前遭遇英超4连败，直至上仗打和李斯特城0比0，先至止血，领队谢拉特季中接手执教维拉，曾经令球队反弹，但原来同古天奴一样都系虎头蛇尾。