曼城周二（26日）深夜将出战欧联4强首回合，硬撼皇家马德里。赛前「蓝月亮」中场根度简向对手莫迪历大笠高帽，盛赞佢喺球场上就好似一位魔术师。不过呢位克罗地亚国脚目前就算踢得好，同皇马嘅续约谈判却未有进展，有可能今夏完约离队。

欧联4强首回合周二（26日）深夜开打，曼城主场恶斗皇马。中场根度简赛前先礼後兵，狂赞莫迪历嘅能力：「莫迪历就如一位魔术师，对车路士嗰场佢交畀洛迪高高斯嗰球助攻令我无言以对！佢踢波嘅方式永远都好似从容不迫咁。」呢位德国球员仲话，当莫迪历赢得金球奖时，自己都戥佢高兴，因为终於有司职同样位置嘅球员攞到呢项殊荣。

目前，36岁嘅莫迪历正向住个人第5座欧联冠军嘅目标进发，而佢今季继续交出稳定发挥，於38场赛事中交出3入球、9助攻。不过现时佢同皇马嘅续约情况未有进展，今夏完约嘅佢有机会季後自由身离队，佢早前受访时指，自己并唔急於同球队倾续约：「我不嬲心态都系踢得一年得一年，现时最重要系对曼城嘅欧联4强，我定会喺球场上全力以赴。」