巴黎圣日耳门(PSG)啱啱重夺法甲冠军，不过教练普捷天奴就帅位不保，据法国《巴黎人报》报道，PSG喺夺冠後立即决定「做嘢」，依家正同普捷天奴以及佢嘅教练团商讨炒鱿赔偿，日内就会正式公布，消息指热刺领队干地已表明有意接手。

普捷天奴喺捧盃後，讲明希望履行埋最後1年合约，但PSG就另有计划，就喺捧盃24小时後即叫普捷天奴倾炒鱿赔偿，据报炒晒普捷天奴团队嘅金额达1,500万欧元。至於总监李安纳度嘅去留暂时未有定案，传闻PSG想搵云格取代呢位巴西名将嘅位置。

新帅人选方面，报道指热刺领队干地有意接掌PSG，并会同意签处2年合约，不过PSG目前首选仍然系施丹。干地今季季中先加盟热刺，早前喺球队陷入低潮嗰阵，曾多次批评球队「唔够班」同前列竞争，如果热刺最後拎唔到欧联参赛资格，转教PSG亦不失为「升呢」选择。