周一(25日)凌晨英超「默西赛德郡打吡」，利物浦喺83%夸张控球率下围攻爱华顿下，凭後备上阵嘅奥历治扭转乾坤，主场赢2比0拎到重要3分，「红军」赢波後继续以1分落後榜首曼城，最後5轮联赛不容有失；爱华顿输波後排尾3，随时面临球会史上首次英超降班。

爱华顿今场以「泊大巴」战术迎战，上半场成功传球唔够20次，但利物浦亦要去到22分钟先有第1脚射门出现，双方球员愈踢愈有火。利物浦一直老鼠拉龟，领队高普60分钟作出调动，奥历治同路尔斯戴亚斯齐齐入场，2分钟後即见到效果，奥历治禁区内回传穆罕默德沙拿，再传中畀安德鲁罗拔臣近门顶入。

利物浦打破僵局後愈踢愈顺，85分钟路尔斯戴亚斯倒挂射门「挞Q」，变成助攻畀奥历治冲前顶入，为利物浦锁定胜局。奥历治上阵机会唔多，今仗只系佢今季第6次上阵(全部後备)，但已有3个入球进帐，而呢位比利时前锋嘅「红军」生涯，9次对爱华顿入6球，堪称「打吡杀手」。

「红军」今场控球率达83%，打破英超史上最高控球率纪录，但赢波全靠奥历治改变战局，高普赛後送上高度赞扬：「佢喺球场内外都系传奇，系非常出色嘅球员、世界级前锋、利物浦最好嘅得分手。奥历治经常斋练冇份踢，呢个决定系非常困难，但所有人都爱奥历治，佢今场再一次成为关键人物。」