正处於降班区边缘嘅列斯联，有多名极具实力猛将在阵，如果呢支老牌球会今季不幸护级失败，呢班球员嘅转会费，随时因约条款而大跌，成为今夏转会窗，被其他球会以贱价收购嘅对象。

上季重返英超嘅英格兰老牌球会列斯联，今季联赛战绩令人失望，虽然新帅马殊上任後，球队表现有起色，但现时仍然喺降班区附近挣扎。据英国传媒了解，如果列斯联跌落英冠，阵中大部分球员将面临百分之20至50的大幅减薪。

为咗令球会财政状况保持健康，列斯联早就喺阵中一班球星嘅合约中加入条款，意味如果降班情况出现，球员嘅转会费将会跌至3000万英镑，等佢哋可以更容易搵到新东家，相比之下，同样深陷降班旋涡嘅爱华顿，想套现阵中身价不菲嘅一众球星，难度极大。

列斯联阵中不乏实力猛将，加云菲腊斯同班福特两名英格兰球星，自然引起唔少球会关注，至於现年25岁嘅巴西攻击好手拉芬夏比洛尼，更有望成为抢手货。