曼联周日（8日）0比4耻辱性不敌白礼顿，正式宣布无缘下届欧联，球会收入势大幅减少，球员嘅薪酬更要面临大减25%，而球星C朗下季可能要接受近几年嚟最少嘅薪酬。

「红魔鬼」周日（8日）作客0比4输畀白礼顿，遭遇近来最耻辱性嘅败局，同时正式宣布无缘竞逐下届欧联，换言之曼联下季将丧失呢项赛事带来嘅丰厚奖金同转播费。

根据估算，欧联能为球队带来嘅年度最高收入为7,166万镑，而欧霸盃就只有前者嘅不足4分之1。曼联今次损失巨额收入，随即触发球员合约入面嘅减薪条件，最高减薪率更可达25%。今季季初由祖云达斯回归曼联时，已由50万镑周薪减至38.5万镑嘅C朗，可能再要减多约10万镑，系佢近年接受过最低嘅人工；而阵中第2高薪嘅迪基亚，都要由37.5万镑减至28.1万镑。

据消息指，球员系有权同球会商讨减薪幅度，但由於呢项条件一早写咗喺年度财政报告，减薪势在必行，睇嚟C朗如果要继续留队，都冇办法唔接受减薪呢个事实。