利物浦喺英超同热刺打和1比1失分，争冠机会受到严重打击，不过冬季转会窗加盟嘅路尔斯戴亚斯，就继续自己突出嘅表现，成为利物浦争冠神器！呢位哥伦比亚国脚更率先尝到联赛冠军滋味，事关波图周日(8日)凌晨喺葡超提前封王，踢咗超过半季嘅戴亚斯亦可得到冠军奖牌。

利物浦喺1月用5,000万镑签入路尔斯戴亚斯，事实证明系超值收购，佢加盟後踢22场已有6个入波同3次助攻，除咗今仗逼和热刺入波之外，上周中欧联4强次回合对维拉利尔亦攻入追平1球，可以话系「红军」锋线入面状态最好一员，利物浦争冠靠晒佢！

无论利物浦最後结果系点，路尔斯戴亚斯今季已经拎到大成功，随住波图周日击败宾菲加後，波图已提前夺得葡超冠军，路尔斯戴亚斯1月转会利物浦前，就为波图喺联赛上阵18场入14球，将会获得葡超冠军奖牌。