曼联上场3比0赢宾福特，系今季最後一场主场赛事，季後极大机会离队嘅连格全场仅列後备，无缘同球迷道别。佢哥哥赛後炮轰「红魔」做法无情，认为曼联青训出身嘅连格值得拥有一个更好嘅离别方式，不过看守领队兰历克反驳，认为自己嘅做法无不妥。

29岁嘅连格，8岁就喺曼联青年军学法，名副其实系「红魔」人，不过佢近季表现欠理想，已沦为球队边缘人，季尾完约嘅佢即将自由身离队。不过，喺周二（3日）赢宾福特3比0嘅今季最後一场主场赛事，看守领队兰历克以尼曼查马迪、桑马达踢正选，去到後段宁愿换入卡云尼同菲尔锺斯，都唔换连格入场喺奥脱福同球迷道别，赛後即惹嚟连格哥哥批评：「20年付出心血同汗水，4项本土锦标、3个决赛入球，都换唔嚟一个道别仪式。」

周五（6日）兰历克被问到连格嘅事情时，佢直言自己做法并无不妥：「首先，喺过去几周，我用佢嘅次数多过佢之前；其次喺对车路士嘅比赛前，佢因为家庭原因请假，我都批准咗。」

德国教头续称，作为教练无法满足所有人：「比赛得3个换人名额，我一定要喺卡云尼、连格同更年轻嘅加拿祖之间做决定，我希望可以同时换3人，但因为规定，最终决定换卡云尼。」佢最後仲话，自己冇时间花喺社交媒体上：「呢啲日子总会有人喺社交媒体分享一啲感受，但对我最重要嘅系唔好太过注重呢啲事。」