周二(10日)凌晨意甲独脚戏，罗马作客0比2不敌费伦天拿，连续4场联赛不胜後前6名位置危危乎。罗马教练摩连奴赛後炮轰球证执法，认为VAR今季「抢走」球队好多分数，要求VAR裁判作出解释。

罗马喺欧协联杀入决赛，今仗作客费伦天拿体能输蚀，处处受制於主队，开波5分钟尼高拉斯干沙利斯禁区边被踢跌，球证最初判冇事，但VAR介入後改判12码，尼高拉斯干沙利斯亲自操刀射入；6分钟後邦拿云度拉个人突破禁区内射成2比0，双方之後再冇入波，罗马吞2蛋联赛4场不胜。

摩连奴赛後对12码争议耿耿於怀：「我等紧VAR畀解释，我睇过重播片段，嗰脚系叫『接触』而唔系『犯规』，球证企喺事发地点10米睇到晒，佢都觉得冇问题，点解VAR要推翻判决？我唔系只系讲今场，VAR今季已经抢走我哋好多分数。」