意甲劲旅祖云达斯一向擅於免转会签入自由身球员，并准备喺今夏转会市场出手，目标瞄准巴黎圣日耳门(PSG)翼锋迪马利亚。

现年34岁嘅迪马利亚将於6月尾约满，虽然佢希望留队，但PSG会方迟迟未同佢倾续约，似乎有意放弃呢位阿根廷国脚。

由於受到伤患问题困扰，迪马利亚今季各项赛事仅上阵29场入3球及7次助攻，又难怪PSG对於同佢续约有保留。

不过，祖云达斯并唔介意迪马利亚水准下滑，更认为佢加盟可以提升球队侧击力，为射手杜辛华荷域创造更多入球机会。

除咗迪马利亚之外，祖云达斯亦睇中PSG另1位阿根廷球员里安度柏利迪斯，希望以1,200万欧元收购呢位27岁中场，里安度柏利迪斯曾经效力罗马，对於意甲并唔陌生，但PSG要求2,000万欧元转会费，成为双方交易最大障碍。