AC米兰喺意甲煞科日重夺联赛冠军，已40岁嘅伊巴谦莫域今场後备上阵，赛後呢位瑞典前锋贯彻「招积」作风，食住大雪茄庆祝，但同时亦显示感性一面，表示将冠军献畀早前过身嘅经理人兼好友拉奥拿。对於自己嘅前途，伊巴谦莫域话仍未作出决定，但暗示可能会挂靴。

伊巴谦莫域今季意甲23次上阵入8球，佢赛後表示：「好神奇！AC米兰11年前捧意甲冠军我在阵，今次冠军我又喺度！我重投AC米兰嗰阵承诺要帮球队重夺意甲，好多人都笑我，但经过几年努力同付出，我终於履行到我嘅承诺。」

伊巴谦莫域特别将冠军献畀拉奥拿：「呢个奖盃献畀拉奥拿，系佢将我带返嚟AC米兰，话我系唯一可以拯救呢间球会嘅人。」被问到如果拉奥拿仍然在生，依家会同佢讲乜嘢，伊巴谦莫域就笑笑口话：「佢会叫我踢多10年，继续『偷』多啲钱！」

早前有传伊巴谦莫域会喺今季完结後挂靴，佢赛後表示未有定案：「首先我要有良好嘅状态，如果我感觉好好，今场就唔会系我职业生涯最後嘅比赛。最近我嘅身体同私生活都遇上问题，但我仍尽所能帮AC米兰拎到冠军，我会喺未来几日作出最後决定。」