曼联今季成绩令球迷失望，不过球队嘅青年军就争番啖气，周四(12日)凌晨喺青年足总盃(U18)决赛，破纪录近7万球迷入场见证下3比1击败诺定咸森林捧盃，费格逊同多位曼联球星都有入场观战，「新C朗」加拿祖光芒四射入2球成为冠军最大功臣。

呢场喺奥脱福举行嘅决赛，有超过6.7万球迷入场打气，打破2007年阿仙奴对曼联嘅青年足总盃入场纪录(3.8万人)，当中包括费格逊、杰斯、笠臣、卡域克、艾拿戴斯等，现役曼联球员包括哈利马古尼、般奴费南迪斯、艾历拜利、麦汤米尼同菲尔锺斯，足证呢场青年赛事嘅瞩目程度。

曼联小将今场表现出色，已入选阿根廷大国脚嘅17岁新星加拿祖，因为踢法同C朗相似而被冠以「新C朗」称号，佢今仗亦不负所托交出2个入波，而且庆祝都学埋C朗嘅「SIU」招牌动作。加拿祖上月已经喺对车路士一仗为曼联首演，前途无限。