曼城强势直奔英超冠军宝座，而且日前宣布签入挪威前锋艾宁夏兰特，原本已经超班嘅战力将会更加惊人。曼城进攻灵魂奇云迪布尼今场食出「大四喜」，庆祝入波嗰阵更做出夏兰特嘅招牌「打坐」动作，似系向呢位未来最佳拍档致敬。

当奇云迪布尼喺24分钟完成「帽子戏法」後，双手做出修禅打坐嘅动作，呢个正正系夏兰特嘅招牌庆祝，不过奇云迪布尼赛後就唔认系同夏兰特有关：「我做呢个动作系因为我入咗3球。」至於领队哥迪奥拿亦首度发表对夏兰特嘅评价：「我当然兴奋，我锺意同好球员合作，好球员会令你成为好领队，夏兰特系个神奇年轻球员，我肯定佢好快会融入球队。」

有奇云迪布尼穿针引线，夏兰特嘅入球能力将可以尽情发挥，今场「大四喜」之後，奇云迪布尼喺曼城累积84个入波同116次助攻，305次上阵就有200个入球贡献(入波+助攻)，相当惊人。