周日晚（15日）英超焦点战，榜首曼城作客「锤仔帮」韦斯咸，竟然先失两粒，喺马列斯射失12码下，几经辛苦追和2:2，失分之下争标有暗涌，令利物浦争4冠仲有希望。

曼城之前5仗联赛赢晒，气势如虹，今仗亦派出加比尔捷西斯、基亚利殊及马列斯攻坚。不过先开纪录嘅系韦斯咸，24分钟柏保路科奴斯一记妙传，查洛保云入楔过埋曼城门将艾达臣摩拉斯送入空门，完半场前再畀查洛保云偷袭得手，接应米查利安东尼奥妙传射成2:0。

易边後曼城终醒晒，49分钟基亚利殊劲射省中奇治戴臣改变方向破网，极速追番1球。正当「蓝月亮」空群出击时，拿朴迪同艾达臣摩拉斯发生误会，几乎畀查洛保云整多粒，好彩佢射唔入，冇耐轮到费兰甸奴回传唔够力，被米查利安东尼奥偷到再笠射高出。去到69分钟，马列斯罚球传中，华迪美高法尔却头槌摆乌龙，令曼城追成2:2。

83分钟「锤仔帮」後防犯大错，加比尔捷西斯被铲跌，球证经VAR介入後，曼城获判12码，但马列斯主射被韦斯咸门将法比安斯基救出，最终双方踢成2:2，可谓两败俱伤，失分对韦斯咸争欧霸入场券及曼城争联赛锦标都有一定影响。