阿仙奴正为英超前4冲刺，不过球队嘅组军工作已经展开，据报佢哋已倾担签入巴西19岁新星马昆奴斯，呢位翼锋被视为巴甲其中一粒明日之星，不过阿仙奴就把握佢同圣保罗合约中嘅漏洞，只系用300万镑就成功抢人，可以话系执到宝。

马昆奴斯18岁就为圣保罗一队上阵，依家已帮呢支巴甲名牌上阵超过30场，包括出战南美自由盃等赛事，原本佢喺2019年同圣保罗签约5年，但国际足协早前以佢签约嗰阵未够18岁为由，裁定合约只能够系基本3年合约，意味佢将会回复自由身，圣保罗为免人财两失，唯有答应平价将佢卖走。

马德里体育会、狼队同阿仙奴都向马昆奴斯斟介，不过阿仙奴嘅巴西总监伊度就成功游说圣保罗做交易，据报双方更打算建立合作关系，将来一齐发掘更多青年球员。司职右翼嘅马昆奴斯，预料会参加阿仙奴季前集训，但亦可能会被阿仙奴外借去其他球会吸收经验。