胜败乃兵家常事，不过对车路士中场美臣蒙特嚟讲，温布莱球场就成为佢嘅地狱。周日(15日)凌晨英足盃决赛佢射失关键12码，令车路士输畀利物浦失落冠军，更加系美臣蒙特3年来第6次喺温布莱球场上演嘅决赛输波！

美臣蒙特首次温布莱决赛系2019年，当时佢以外借身份效力英冠打比郡，结果喺升班附加赛决赛输畀阿士东维拉，无缘带领球队升上英超。第2年佢重返车路士，协助球队杀入英足盃决赛，但输畀阿仙奴屈居亚军；上季车路士再入英足盃决赛，结果输畀李斯特城再一次饮恨。

上年夏天欧国盃决赛，美臣蒙特协助英格兰杀入决赛，但激战下互射12码输畀意大利，第4度喺温布莱铩羽。今季车路士先後杀入英联盃同英足盃决赛，结果2次都被利物浦互射12码击倒，意味呢位23岁球星出道以来，6次喺温布莱踢决赛全部输晒。