向住「4冠王」目标进发嘅利物浦，周日(15日)凌晨率先拎到今季第2个冠军，英足盃决赛互射12码击败车路士後，领队高普亦成功改写历史，成为曼联传奇费格逊之後，英格兰第2个为1间球会囊括英超、英足盃、英联盃、欧联、欧超盃同世冠盃6大锦标嘅领队。

高普自2015年执教利物浦後，欧联、英超等重要冠军都拎过晒，不过同本土2大盃赛始终无缘，直到今季终於一尝心愿，继2月份英联盃决赛互射12码赢车路士捧盃後，英足盃决赛又历史重演，令高普实现利物浦嘅「大满贯」。英格兰足球史上，只有费格逊曾经带领曼联拎晒6大冠军，足证高普传奇地位。

有趣嘅系，高普呢6个冠军当中，有3场决赛都系踩住车路士封王，除今季英联盃同英足盃之外，2019年嘅欧超盃同样系互射12码赢车路士捧盃。高普赛後表示：「呢场系令人难以置信嘅激战，胜负嘅差距非常之小，我好同情车路士，努力咗120分钟而冇回报系好难受，但对我嚟讲就非常满足。」