曼联今夏改由荷兰名帅坦哈格执教，最大目标就系重返欧联赛场，据英国《太阳报》报道，「红魔鬼」向坦哈格发出巨额奖金，如果佢可以带领球队拎到欧联资格，可以「独袋」300万镑奖金，认真和味！

坦哈格喺曼联年薪为900万镑，只系得同市死敌曼城领队哥迪奥拿人工嘅一半，不过坦哈格合约内就有唔少奖金条款，只要达到某啲成绩就可以「解锁」，其中欧联资格系最重要一项，只要实现就可袋走300万镑，平均周薪会急增至23万镑。

报道指曼联出手咁重，系因为球队如果连续2年冇得踢欧联，赞助收入将会大缩水，好似波衫赞助商adidas嘅7,500万镑1年赞助费，当中2,500万镑系同欧联挂钩，其他赞助商亦有类似嘅条款，若坦哈格真系能够帮曼联再战欧联，呢300万镑就湿湿碎啦！