法国中场古安杜斯向来系惹火尤物，今夏正式由阿仙奴转会马赛後，火爆性格依家冇改变。马赛周四(28日)同贝迪斯踢热身赛打和1比1，古安杜斯就同41岁嘅祖亚昆开拖，搞到场面大混乱，球证亦要提早出鸡完场。

两队今仗一直僵持，古安杜斯几次凶恨拦截已经引起贝迪斯球员不满，曾经发生口角。当马赛喺87分钟入波後，古安杜斯就向住贝迪斯後备席做出1比0手势挑衅，祖亚昆睇唔过眼走去闹佢，古安杜斯就不断爆粗回应。补时阶段贝迪斯追平，祖亚昆就去「回敬」古安杜斯，双方球员即互相推撞，古安杜斯报称畀人扯头发，球证见场面混乱，补时未够都照吹完场。

23岁嘅古安杜斯出名火爆，2年前效力阿仙奴期间，曾喺对白礼顿嘅比赛中向马奥比「叉颈」，闹对方系垃圾兼搵钱少，事後更拒绝阿仙奴要求佢作出道歉，结果被「放逐」，马赛上月用900万镑正式将佢买断，估唔到依家火爆性格仍然冇改变。