相隔85日，C朗终於喺周日(7月31日)晚热身赛，再次为曼联上阵，主场出战华历简奴，但呢位37岁葡萄牙球星表现强差人意，成为红魔鬼今仗唯一一位踢完上半场就被换走嘅球员，对於呢位球王而言，绝对系奇耻大辱。

C朗可能因此而发脾气，比赛未结束已经提早走人，经此一役後，相信C朗转会可能性将进一步升温。

由於曼联早1日先至同马体会踢热身赛，所以今仗阵容大轮换，正选之中得C朗同华拉尼系常规主力，2位新兵基斯甸艾历臣、利辛度马天尼斯都担正。

主角C朗因不满曼联无缘来届欧联，要求转会，已缺席曼联开操後首5场热身赛，直至今仗开咧前最後1场热身赛，先至披甲。不过，C朗久疏战阵，状态明显不足，仅於开赛12分钟有1次射门，但唔中目标。

曼联主帅坦哈格趁「饮水时间」讲解战术，C朗更加表现得不耐烦，上半场两队互无纪录，半场休息後，C朗已经被换离场，令呢位射手最尴尬嘅事系入替佢嘅阿密特迪亚路，上阵3分钟就入波，为曼联打开纪录。

9分钟之後，华历简奴凭艾华路加西亚建功扳平1比1，曼联近3场热身赛仅获得2和1负，冇晒早前3连胜嘅锐气。

相比赛果，C朗一举一动更加受注目，有人喺完场前10分钟，影到佢已经离开球场，未知有冇获得主帅坦哈格批准，但从C朗冇同球队共同进退，已反映佢同曼联嘅关系跌至新低点，离队似乎已成定局。