英超劲旅热刺今个夏天大展拳脚，被睇好有机会挑战曼城同利物浦嘅霸权，首仗大胜修咸顿4比1之後，领队干地仲未满足，据报佢哋仲想喺转会窗完结前作出重磅收购，目标直指罗马「新王子」尼高路辛尼奥路，转会费高达6,000万欧元！

据意大利《共和报》爆料，干地对23岁嘅尼高路辛尼奥路非常欣赏，喺罗马签入保罗戴巴拿後，热刺就想尝试签入呢位意大利国脚。

祖云达斯之前曾出价4,000万欧元收购被拒，热刺为成功抢人，据报愿意用现金再加尼当比利、坦根加2名球员作筹码，贴近罗马开出嘅6,000万欧元索价。

热刺夏天已签入李察利臣、比苏马、比列锡等球星，而自从意大利总监柏拉迪斯同领队干地上任後，更加频频向意甲球员埋手，之前签入基斯甸罗美路、古路斯夫斯基等都大获好评，继续喺意甲「寻宝」并唔意外。