车路士今个夏天大换血，美国国脚基斯甸普列锡都被列入清洗名单，呢位翼锋喺头3轮联赛都只系後备上阵，佢爸爸马克就「代子出头」，喺社交网狂Like多条批评车路士嘅贴文，包括直指领队杜曹系「球员毁灭者」。

车路士0比3输畀列斯联後，马克被发现喺twitter连续like咗3个贴文，第1个系批评普列锡竞争对手美臣蒙特同夏维斯嘅表现，认为普列锡值得有机会证明自己；第2个就系叫普列锡为自己前途着想，应该尽快离开车仔；第3个就矛头直指杜曹：「杜曹系球员毁灭者！佢冇能力建立同激励球员，只系识买新玩具嚟玩尚烂，之後又再重覆。」

其实马克上季尾亦曾向杜曹开火，当时杜曹就回应：「我唔担心有球员嘅爸爸唔锺意我，球员冇得踢唔开心系好正常，但车路士嘅竞争就系咁激烈，呢点由签约第1日应该已经知道。」