周一(22日)凌晨西甲赛事，巴塞隆拿作客4比1大胜皇家苏斯达，罗拔利云度夫斯基攻入加盟後首个入波，而且仲「起孖」庆祝自己34岁生日。盛传将转会车路士嘅奥巴美扬，今场就冇份上阵。

首战食白果嘅「罗拔仔」，今场只用44秒就近门射入，不过5分钟後阿历山大伊沙克即为皇苏追成平手。下半场中段巴塞发力，奥士文尼迪比利左路抽射远柱建功，2分钟後罗拔利云度夫斯基射入3比1，加上安素法迪79分钟埋斋，协助巴塞大胜4比1。

今场适逢系「罗拔仔」34岁生日，巴塞对上一个喺生日梅开二度嘅球员，正正就系1996年首季登陆嘅「大哨」朗拿度，教练沙维赛後大赞：「罗拔利云度夫斯基系模范球员，你可以睇下佢点样走位，佢系天生嘅领导者。」