巴塞隆拿中场法兰基迪庄今夏一直成为曼联同车路士嘅争夺目标，德甲班霸拜仁慕尼黑依家亦加入争夺战，据悉拜仁想采用当年向巴塞借用菲腊比古天奴嘅方式签入法兰基迪庄，将来可以买断呢位荷兰国脚。

拜仁慕尼黑3年前以「先借後买」方式向巴塞签入菲腊比古天奴，但因为呢位巴西国脚表现未如理想，拜仁最後并冇启动买断条款。

西班牙《每日体育报》指拜仁可能再次用「先借後买」签法兰基迪庄，除咗支付借用费之外，仲会负担法兰基迪庄嘅全额人工。巴塞既可以腾出薪酬空间，亦唔会失去法兰基迪庄嘅拥有权，绝对系一举两得。

对於拜仁而言，亦唔需要立即付出巨额转会费，仲可以睇埋法兰基迪庄表现，将来再决定是否买断佢，呢个方案对两间球会都有利。

值得一提，拜仁今夏已经签入荷兰国脚马菲斯迪历特，法兰基迪庄同呢位中坚既系同胞，又系前阿积士队友，或者会有兴趣去拜仁同佢合作。