七月初，本栏就曾经同各位球迷睇过日职联球队 喺国际转会窗重开後的瞩目引援，而喺转会窗关闭前（9月2日），仍有唔少日职联球会作出最後努力加强阵容，今日就同大家再更新下各队 喺呢两个月的重点转会。

水手、三箭、鹿角求变追逐冠军

日职联榜首形势混乱，虽然川崎前锋经过周中补赛後重上榜首，但横滨水手、广岛三箭及鹿岛鹿角随後步步进逼。虽然争标形势紧凑，但四支球队的转会操作却大有不同

暂时过住一哥瘾的川崎前锋， 喺呢两个月就采取以不变应万变的态度去争取卫冕，佢哋冇新兵加入不特止，更将两名後备兵塚川孝辉、田边秀斗分别送至FC东京及千叶市原，监督鬼木达似乎对现有的阵容信心十足。

二哥横滨水手方面，转会活动亦系相对淡静，佢哋有後备中场桦山谅乃介被外借到日乙球会山形山神，但同时由巴甲球会彭美拉斯签入翼锋恩马图斯。恩马图斯在加盟前就以借用形式效力葡萄牙球会摩里伦斯，有不俗的比赛经验，之不过佢 喺八月头加盟後仲未试过代表横滨水手出场，相信暂时都唔会系孭飞人脚。

现时排第三的广岛三箭，今季由史基比领军下表现脱胎换骨，为了争逐锦标佢哋就决定加强火力， 喺八月中引入塞浦路斯射手苏迪利奥。虽然塞浦路斯唔算系足球强国，但苏迪利奥 喺加盟前已经 喺保加利亚劲旅卢多格德斯打响名堂，更 喺上周对大阪樱花的比赛火速开斋，今次广岛三箭似乎冇入错货。

争标形势相对较为被动的鹿岛鹿角，今个夏天就有相当大的变动，除了有首席射手上田绮世外流欧洲发展，更 喺八月初解除瑞士籍监督韦拿的职务，改由球会名宿之一岩政大树领军，务求尽地一煲。球员方面，巴西中场祖安艾兰奴被卖至大阪飞脚，但亦有尼日利亚籍中锋艾历基由比利时球会比士佐特VA加盟，又睇下佢有冇能力改善鹿岛鹿角前线的入球能力喇！

中游球队各有志向

至於一众中游球队 喺今个夏天的转会取向则各有不同，柏雷素尔、大阪樱花皆冇重大引援活动；而浦和红钻 喺六月引入飞燕诺翼锋白赖仁连斯臣加盟後亦再冇任何行动，似乎监督洛迪古斯都唔希望为近期状态甚佳的大军再作改动。

仲有机会争逐前四的FC东京， 喺今个夏天的变动相对较大，永井谦佑、高萩洋次郎两员老将皆被送走，而 喺日前亦同伤多过踢的巴西中坚般奴乌维尼解约。新加盟球员方面，除了有塚川孝辉由川崎前锋加盟，亦由士砵亭借得巴西中锋雷斯费利浦加盟。呢位28岁射手 喺暑假前同样以借用身份为希腊球会基利特效力半季，已经取得8个入波；而 喺上周大胜柏雷素尔的赛事佢亦取得开斋波，似乎同FC东京的新队友磨合得唔错。

今季高不成、低不就，表现相对令球迷失望的名古屋鲸鱼，呢个夏天为阵容作出了较大的调整，但取向就有少少令人费解。除了有斋藤学 喺六月底已经被卖至韩职球会水原蓝翼，阿部浩之及金崎梦生两员老将同样被送走，前者被借用到湘南比马，而金崎梦生就落实同球队解约，暂时去向未明。虽然送走唔少老将，但新的引援就唔系向年青球员埋手，由湘南比马借用加盟的永木亮太、由FC东京回归加盟的永井谦佑皆年过30，由福冈黄蜂转会加盟的27岁中场重广卓也，已经系相对较为年青，呢盘旗点捉似乎只有监督长谷川健太先知。

清水心跳经过六月初的监督变动後，战绩慢慢回升，除了 喺六月中有由欧洲回流的北川航也回归外，之後亦有猛将加盟。早前同大阪樱花搞到不欢而散的前国脚乾贵士， 喺七月尾就落实以自由身加盟清水心跳，乾贵士 喺加盟前就一直 喺日乙球会冈山绿雉跟操，状态不俗的佢就迅速融入清水心跳阵中，更 喺上周对京都不死鸟的赛事射入加盟後首个入波，显得宝刀未老。此外，清水心跳 喺七月底亦从巴甲球会福塔雷萨买入翼锋耶高加盟，呢位有「比卡超」绰号的矮脚虎最近已经连续5场取得正选，相信 喺来季都会系球队的主力之一。

下游球队加强火力争护级

除了争标形势紧凑，日职联的护级形势同样混乱。现时排12位的福冈黄蜂，同包尾的磐田山叶亦只有6分差距，可见护级的情况何其混乱。为了力保日职联席位，一众下游球队 喺呢个夏天都着重加强前线火力，务求早日上岸。

传统大会大阪飞脚今季表现未如理想，後防不稳之余前线亦欠锐利，佢哋就得到曼城的食野亮太郎及鹿岛鹿角的祖安艾兰奴两名翼锋加盟，支援前线的李安度彭利拿及安达臣柏德列。大阪飞脚得到佢哋加盟後，近4场取得2胜2负，同时亦取得5个入波，似乎有立竿见影的作用。

北海道札幌冈萨多今届缺少了猜拿帖後火力大减，令球队成绩受到直接影响，但被卷入护级漩涡就有少少令人始料不及。为了加强攻力，佢哋就由水原三星签入高大中锋金健熙加盟，27岁的金健熙代表过南韩国家队上阵3次，身高达1米86，相信有能力加强札幌 喺前线的冲击力。

季初一度表现令人惊喜的京都不死鸟，联赛未够一半就已经现晒型，彼得乌达卡虽然入球能力不俗，但始终年事已高， 喺日职联就显得力有不逮。今个夏天京都不死鸟一口气签入攻击中场阿伦卡利奥斯及前锋普连奴保亚两名巴西外援加盟，当中阿伦卡利奥斯加盟前 喺沙特阿拉伯联赛效力艾阿达拿全季取得8个入球，相信有能力改善京都不死鸟的攻击力。

亿万大军神户胜利船，踢到呢一刻仲系排紧尾二，佢哋前线阵容虽然豪华，但踢唔出应有水准，因此 喺六月底已经由仁川联买入黑山中锋史提芬穆高沙增加进攻层次。至於为了修补穿窿的防线，佢哋 喺八月亦急急由巴甲球会法林明高借用年仅23岁的马菲奥科拿加盟，希望靠呢位之前被外借到法甲蒙彼利埃效力的中坚稳定後防。此外，神户胜利船亦从韩职球会FC江原招揽前日本国家队中场小林佑希加盟，30岁的佢虽然近年表现远不及当年效力荷甲球会海伦芬的时期，但以佢的级数相信有能力填补 喺桥本拳人离队後的空缺，而小林佑希 喺之前的亚冠盃淘汰赛亦有份上阵，显出有唔错的状态，相信可以为神户胜利船起正面作用。

从上述所见唔少球队 喺今个夏天都有积极的增兵行动，以求改善成绩，而今季日职联不论系争标抑或系护级的形势均相当混乱，经过一番引援活动後肯定会令联赛榜出现唔少变动，各位日职联球迷记住密切留意今季余下比赛的进程喇！

本周日职联直播时间：

9月2日下午6：30 北海道札幌冈萨多 对 大阪樱花 有线电视601／661

9月3日下午6：00 FC东京 对 横滨水手 有线电视601／661

9月3日下午6：00 湘南比马 对 川崎前锋 有线电视602／662

本周日乙直播时间：

9月4日下午5：00 枥木SC 对 群马草津温泉 有线电视601／661

9月4日下午6：00 熊本罗亚素 对 大宫松鼠 有线电视602／662