周日(4日)凌晨意甲「米兰打吡」成为拉菲尔利亚奥个人表演舞台，呢位23岁葡萄牙国脚射入2球及1次助攻，带领AC米兰以3比2反胜国际米兰，赢出争标关键「6分波」，皇马已准备明夏收购呢位新世代射手。

开赛21分钟，国米由波索域入波打开纪录，但今仗主角属於第100场意甲上阵嘅拉菲尔利亚奥，佢28分钟建功，迅速为A米扳平，亦系佢首次喺意甲「米兰打吡」入波。

换边之後，拉菲尔利亚奥左传中，基奥特射成2比1反超前，跟住利亚奥个人表演，扭入禁区窄角度射成3比1。

虽然国米由迪斯高入番1球，追至2比3，但无法收复失地，A米近12年首次连续2次意甲击败国米。

AC米兰赢波功臣拉菲尔利亚奥今仗表现可圈可点，除咗入2球及1次助攻，仲有34次触球，19次传球有14次成功交畀队友，5次射门3次中目标。

呢位葡萄牙新星上季演出已经光芒四射，当选上季意甲最佳球员，今夏传出皇马想收购佢，但A米要求1.5亿欧元转会费，令「银河舰队」暂缓出手，唔排除明夏再报价，拉菲尔利亚奥亦有意上「舰」，行前辈C朗旧路，恐怕A米明年都系留唔住佢。