啱啱宣布做手术嘅保罗普巴，近日发生「兄弟阋墙」闹剧，佢被哥哥马特斯普巴踢爆曾聘请巫师，向法国队友基利安麦巴比落降头。据报保罗普巴已向警方承认曾经聘请过巫师，但只系为非洲慈善组织服务，而另一主角麦巴比周二(6日)亦首度开腔，表示会相信保罗普巴嘅解释。

马特斯普巴早前踢爆保罗普巴请巫师，保佑自己唔受伤之外，仲向麦巴比落降头令对方受伤，呢位法国国脚就向警方报案，称受到马特斯普巴同几名好友勒索。法国警方调查期间，保罗普巴承认的确请过巫师，但强调只系搵佢做帮助非洲慈善组织，冇向任何人落过降头。

无辜成为主角嘅基巴比，周二喺欧联赛前记者会入面首度回应事件：「今次系保罗普巴同佢哥哥嘅对质，我更加愿意相信我嘅队友，依家唔系加油加醋嘅时候，我同呢件事完全冇关系。」报道指保罗普巴亦向警方展示手机讯息，指马特斯普巴喺佢今夏重投祖云达斯後，曾要求瓜分转会奖金。