今季英超开咧冇几耐，已连接有领队被炒，柏加、杜曹先後下台，西班牙传媒爆料指成绩大倒退嘅利物浦亦有换帅计划，准备邀请西班牙国家队领队安历基接替高普，担任红军下一任主帅。

由於西班牙将会出战11月下旬揭幕嘅世界盃决赛周，预料安历基年尾前应该唔会转工，未来3个月成为高普最後救赎机会。

利物浦今季踢6场英超仅9分，创下高普执教以来最差开季成绩，加上上仗欧联1比4大败於拿玻里脚下，争逐两大锦标前景暗淡，令高普面临巨大压力。

事实上，呢位55岁德国名帅执教利物浦已近7年，战术部署已被各大劲敌洞悉，再难占据优势，佢以前执教缅恩斯同多蒙特都系大约7年就走人。

红军最大问题系队内主力捧过晒英超、欧联冠军，缺乏争胜饿渴感，特别系射手穆罕默德沙拿跌Watt最明显，今季上阵8场仅入3球，近4仗更加食白果，其他位置亦开始老化，红军的确需要1位新帅改革球队。

高普早前被传媒问到前途问题，虽然佢坚称会方唔会轻易换帅，但足球世界瞬息万变，如果成续唔符合要求，领队往往第一个被开刀，前车路士主帅杜曹就系最佳例子。

盛传利物浦已经接触安历基，了解对方有冇兴趣接掌红军，呢位52岁西班牙名帅曾经率领巴塞隆拿喺2014/15年球季成为欧联、西甲及西班牙盃「三冠王」，亦协助西班牙打入上年欧国盃4强及欧国联决赛，教波功力深厚，足以同同属「巴塞系」嘅曼城领队哥迪奥拿抗衡。

不过，安历基会否答应执教利物浦，好大程度上要视乎西班牙喺今届世界盃嘅表现而定，一旦成绩欠佳，佢可能会辞职，届时就可以顺理成章等候接替高普。