今季英超成绩优异嘅热刺，周三(14日)喺欧联D组首尝败仗，补时阶段连失2球下，作客0比2不敌士砵亭。意大利教头干地领军能力受到肯定，不过佢带队踢欧联成绩惨不忍睹，历来只有36%胜率，热刺想喺欧联发围似乎有难度。

热刺今场继续用李察利臣拍住哈利卡尼、孙兴民进攻，牌面强劲但踢落完全冇创造力，相反士砵亭快速反击威胁更大，去到补时阶段，包连奴接应角球顶入为主队领先，2分钟之後再由艾法高美斯连过数关窄角度射入，带领士砵亭赢2比0，喺D组2战全胜排榜首。

今届欧联分组赛抽签後，热刺被公认抽到「上上签」，被睇好可以轻松出线，不过球队表现就令人失望，上轮靠马赛踢少个下先赢波，今场更加输埋，干地独沽一味嘅反击战术喺欧联成为弱点，虽然佢教过祖云达斯、车路士同国际米兰等豪门，但最叻都系试过入欧联8强，36次欧联领军只有13胜、11和、12负成绩，干地出战欧联似乎冇乜计喎！