曼联将於周五(16日)凌晨欧霸盃作客舒列夫，领队坦哈格透露，前锋拉舒福特因为肌肉受伤，无缘今场比赛，意味呢位24岁射手可以大条道理申请国际赛免役，唔使为英格兰出战9月底2场热身赛，留力为曼联出战10月2日嘅英超「曼市打吡」对曼城。

拉舒福特今季表现大勇，踢6场已经有3球进帐及2次助攻，包括对阿仙奴梅开二度。坦哈格指「福仔」就系对兵工厂一役整伤肌肉，一直未痊愈，所以唔使佢踢今场欧霸盃。

适逢英格兰主帅修夫基即将公布大军名单，出战2场热身赛，包括9月24日凌晨对意大利，9月27日凌晨对德国，坦哈格依家话拉舒福特有伤，摆明唔想佢为国出征。

事实上，曼联踢完对欧霸盃对舒列夫後，将於10月2日晚英超作客曼城，坦哈格当然唔希望拉舒福特冒险入选国家队。