今夏约满离开马体会嘅苏亚雷斯，2个月前先至重投母会蒙特维多国民队，但话咁快，又准备走人，据悉呢位35岁前锋希望喺11月世界盃举行前，加盟欧洲球会，曾经传出有意签佢嘅马赛、阿士东维拉，随时成为「哨牙苏」下一站落脚地。

苏亚雷斯今年7月底加盟蒙特维多国民队，表现不俗，上阵8场射入4球，但双方只系签短期合约，会方亦早已事先声明，叫球迷唔好对苏亚雷斯有太大期望，因为佢随时会离队。

事实上，呢位乌拉圭国脚始终心系欧洲联赛，所以打算合约届满後，以自由身再战欧洲球坛。

自由身球员不受转会窗时间限制，所以苏亚雷斯有机会喺世界盃举行前，再次喺欧洲落班，踢高水平赛事，有助佢提升状态为乌拉圭出战今届世界盃决赛周。