日本国脚中岛翔哉今夏由波图转投土其耳球队安塔莱亚，周日(18日)凌晨首次喺主场亮相，但佢後备入替只系15秒就因粗野拦截食红牌，被传媒评为「史上最差首演」，最惨系中岛翔哉屋企人今仗专程入场打气，睇见囝囝被逐，阿妈即场喺看台爆喊！

28岁嘅中岛翔哉喺葡超打出名堂，2019年获班霸波图垂青收归旗下，可惜表现未如理想，今夏转投安塔莱亚展开新一页。周日主场迎战Adana Demirspor一仗，中岛翔哉喺59分钟後备登场，当时安塔莱亚落後0比1，点知比赛15秒佢就心急飞铲踢中对手，球证原本出示黄牌，但VAR认为危险动作，球证最终改判红牌将佢驱逐。

看台上中岛翔哉几位家人见到呢一幕都好震惊，阿妈更忍唔住即场掩面爆喊，最终安塔莱亚输多2球，惨吞3蛋完场。