命运嘅嘢好玄妙，有啲球员有冠军命，但亦有黑脚存在，网民发现，英格兰上场不敌意大利，笃定降班欧国联B组後，原来已经系哈利马古尼生涯第5次经历降班，系足球史上经历最多次降班嘅球员。

马古尼初出道效力锡菲联，首个球季球队就由英冠降落英甲，当时佢仲系新人，大家都唔知佢系黑脚，但佢2014年转会侯城之後，初战英超就犀利嘞，佢上半季踢侯城，该季中曾经短暂外借到韦根，结果到季尾侯城同韦根双双降班，马古尼经历降班「梅开二度」。

之後几年佢一直留喺侯城，球队亦重返英超，但去到2017年，侯城再度降班，亦系佢生涯第4次降班，之後转会去咗李斯特城，跟住再去曼联，就冇再畀降班黑气缠住。

不过势估唔到，球会唔使降班，但国家队一样走唔甩，欧国联设有升降制，英格兰今届成绩差劣，马古尼今季无论喺曼联定英格兰，4次正选全败，依家仲降班黑气回归，认真大镬。

更有网民指出，马古尼加盟曼联4季，喺英超累积仅入4球，但佢生涯却经历5次降班，降班次数都比为曼联入波更多，真系该煨。