西甲劲旅巴塞隆拿喺今个国际赛期「伤患惨重」，当中以乌拉圭中坚朗奴阿拿奥祖最大镬，球会周二(27日)宣布佢右脚肌肉撕裂要做手术，将会缺席2至3个月时间，肯定错过年底嘅世界盃决赛周，而巴塞亦会获国际足协(FIFA)赔偿。

虽然乌拉圭希望朗奴阿拿奥祖可以用保守疗法，顶埋世界盃决赛周先至做手术，但巴塞为免佢步乌姆迪迪当年带伤踢世界盃，导致职业生涯一落千丈後尘，决定要佢即刻做手术。据《世界体育报》报道，只要有球员喺国际赛期间受伤，而养伤时间超过28日，就会触发FIFA嘅赔偿机制。呢位中坚每养伤1日，巴塞隆拿就可获最高20,458欧元赔偿，直到佢康复重返球队为止。

除朗奴阿拿奥祖之外，巴塞今个国际赛期仲有祖利斯古迪、迪比、法兰基迪庄同奥士文尼迪比利受伤，消息指祖利斯古迪可能要休息1个月，而其他3位球员只系轻伤，预料好快可以复出。