今届卡塔尔世界盃破天荒喺年底举行，欧洲联赛赛期被打断，一众国脚亦面对紧密赛程。据阿根廷传媒报道，阿根廷足总近日正同多间英超球会接洽，希望喺世界盃开始前1个星期，畀旗下国脚避战休息，受影响球会包括曼联、热刺、曼城、阿士东维拉同白礼顿等等。

阿根廷首场世盃分组赛，系11月22日对沙特阿拉伯，而英超暂停前最後一场赛事，就系11月14号富咸对曼联，中间只系得1个星期左右时间。阿根廷着名记者Doble Amarilla报道，足总已经联络各支英超球会，要求佢哋喺最後1轮联赛畀旗下国脚休息，以免喺决赛周开始前有乜「冬瓜豆腐」。

依家阿根廷国家队入面，曼联嘅利辛度马天尼斯、热刺嘅基斯甸罗美路、维拉门将达米安马天尼斯都系正选主力，曼城前锋祖利安艾华利斯、白礼顿中场阿历斯麦亚里士打亦好大机会入选，不过英超赛事寸土必争，曼联、热刺、曼城等更加要为争标博命，阿根廷足总嘅如意算盘都几难打得响。