现时效力美职球队国际迈亚密嘅阿根廷着名射手希古恩正式宣布，今季美职收咧之後，佢就会挂靴，结束17年职业球员生涯。

呢位34岁前锋曾经捧过西甲、意甲冠军等多项锦标，但因为喺2014年世界盃决赛单刀射斜，成为阿根廷失冠罪人，抱憾终生。

希古恩喺记者会上宣布退役决定时，神情哀伤，佢话系时候同职业足球讲再见，畀自己好好同家人享受生活，并透露早於3、4个月前已经作出挂靴决定，同球会达成协，今季美职结束後离开。

希古恩喺阿根廷劲旅河床出道，2007年加盟皇马效力长达6年，捧过3次西甲冠军，佢宣布挂靴後，皇马都有向佢发出祝福及感谢以往为球队作出嘅贡献。

此外，希古恩效力祖云达斯期间亦赢过3次意甲冠军，同埋分别协助拿玻里夺得意大利盃冠军，以及帮车路士捧欧霸盃。

希古恩2年前加盟国际迈亚密，曾经表现低迷，但今年7月开始，表现着晒火，近14场联赛有12球进帐，甚至有球迷呼吁佢重返阿根廷国家队。国际迈亚密今季仲有2场常规赛要踢，力争季後赛资格。

希古恩曾经为阿根廷入31球，但佢喺2014年世界盃决赛对德国，单刀射斜放生对手，结果阿根廷战至加时失守输0比1，同冠军擦身而过，成为希古恩球员生涯最大污点。