利物浦上场联赛2比3不敌阿仙奴，开季8场联赛只得10分，正所谓屋漏偏逢连夜雨，佢哋欧联前再收噩耗，进攻核心人物路尔斯戴亚斯因为膝伤严重，最快要等到世界盃後先可以复出，将会缺席未来10场赛事，当中包括3场欧联以及对曼城、热刺嘅英超大战，魔鬼赛程好难顶！

「红军」球员今季轮住受伤，令本来已经单薄嘅阵容更见紧张，继新加盟嘅艾法美路做手术抖4个月後，上场对阿仙奴再有路尔斯戴亚斯同阿历山大阿诺特受伤。利物浦周二(11日)检查後，证实路尔斯戴亚斯膝头重伤，虽然唔需要做手术，但喺11月中英超停顿前都冇得上阵，最快要到12月尾联赛重要先有机会复出。

路尔斯戴亚斯所属嘅哥伦比亚未能出战世界盃，但对利物浦就系重大打击，球队今季11场英超同欧联赛事，呢位翼锋有10场都系正选上阵，而且已有4个入球。路尔斯戴亚斯将会缺席世盃前10场赛事，当中包括剩低嘅3场欧联分组赛，会决定「红军」今季欧联命运。

除咗路尔斯戴亚斯之外，右闸阿历山大阿诺特嘅足踝伤势亦令球迷关注，领队高普赛後曾指佢「情况差劲」，但未知最新检查结果系点。利物浦周四(13日)凌晨欧联作客格拉斯哥流浪後，周日(16日)英超将会主场大战曼城。

●路尔斯戴亚斯缺席10场赛事

欧联 客Vs 格拉斯哥流浪

英超 主Vs 曼城

英超 主Vs 韦斯咸

英超 客Vs 诺定咸森林

欧联 客Vs 阿积士

英超 主Vs 列斯联

欧联 主Vs 拿玻里

英超 客Vs 热刺

英盃 主Vs 打比郡

英超 主Vs 修咸顿