祖云达斯喺周三(12日)凌晨欧联H组，作客0比2不敌海法马卡比之外，仲损兵折将，翼锋迪马利亚踢咗24分钟就受伤退下火线，呢位34岁老将今季已经第3次伤出，令人怀疑佢能否为阿根廷出战下月世界盃决赛周。

迪马利亚今夏以自由身加盟祖云达斯，首轮意甲入波兼助攻，但亦告受伤，上月初对费伦天拿，再次受伤。佢喺今仗欧联一次追波过程中，疑似拉伤大腿肌肉，被逼退下火线，不禁落泪，似乎情况唔多乐观。

由於迪马利开季短短2个月已经3次受伤，令人怀疑佢嘅身体状况能否应付今届世界盃。

另一位阿根廷进攻球员保罗戴巴拿早前受伤，可能无缘今届世界盃，如果冇埋迪马利亚，肯定削弱呢支南美劲旅嘅争标本钱。