曼城射手艾宁夏兰特今季表现神勇，为「蓝月亮」上阵13场入20球，被捧为新世代球王，受万人敬仰，连领队哥迪奥拿嘅女儿Maria都爱上呢位22岁挪威国脚，据悉哥帅支持囡囡同夏兰特拍拖，希望藉以留住佢，以免被皇马抢走。

根据外媒报道，夏兰特成为球坛红人之後，现年21岁嘅Maria都畀佢吸引住，加上有位领队爸爸撑腰，可以经常去探班，主要系去睇夏兰特，两人年龄接近，自然好快混熟。

由於夏兰特冇女朋友，两人应该有发展空间，据悉哥迪奥拿都支持Maria同夏兰特拍拖，因为佢了解「夏仔」人品唔错，系女婿人选。

不过，亦有阴谋论指哥帅系希望用女儿绑住夏兰特，令佢长期效力曼城，因为曾有传夏兰特口头上答应皇马会长皮里兹，2年後加盟呢支西甲劲旅，但如果夏兰特成为哥迪奥拿嘅「准女婿」，情况就完全唔同。

事实上，除咗哥迪奥拿之外，唔少曼城球迷亦喺Maria社交网留言，希望佢同夏兰特结婚，相信目的都系想用「美人计」为曼城绑住夏兰特。