国际迈亚密喺美职季後赛0比3不敌纽约城後，该队阿根廷射手希古恩嘅球员生涯亦告结束，赛後佢蹲下掩面落泪，宣布挂靴。

34岁嘅希古恩喺河床出道，喺欧洲踢过皇马、祖记、拿玻里、AC米兰同车路士，两年前转战美职国际迈亚密，上阵67场入27球11助攻，国家队上阵75场入31球，但多次在国际大赛饮恨，包括世界盃、美洲盃及南美国家盃。

终於挂靴，一切俱往矣，希古恩感触表示：「梦想结束喇，新生活开始，我所爱嘅一切都结束喇，系我生命嘅一半，17年足球生涯，直到今日我都付出一切，我嘅生活将进入新阶段，我好满足，我会享受之後嘅一切，我嘅伴侣、女儿、家人、朋友。」

唔踢波有咩打算，希古恩表示无意执教，但对於心理辅导工作感兴趣：「呢点喺比赛中好重要，你可以拥有所有技能及天赋，但如果精神状态唔好，咁一切都冇意义。」