世界盃决赛周揭幕前，葡萄牙不断遭受打击，除咗最新迪亚高祖达受伤，无缘今届赛事之外，另外1位锋线球员柏度尼图亦因伤长抖缺席，加上拉法施华以「私人原因」退出国家队，意味葡萄牙近1个月，失去3位进攻球员，主帅费兰度山度士惟有寄望效力AC米兰嘅「黑C朗」拉菲尔利亚奥协助C朗撑起锋线。

拉法施华9月中突然宣布以「私人原因」退出国家队，令人大感意外，毕竟呢位效力宾菲加嘅进攻中场年仅29岁，有份协助葡萄牙捧2016年欧国盃冠军，佢决定退出国际赛舞台，曾引起葡萄牙足总不满，指佢冇承担。

至於效力狼队嘅柏度尼图喺10月初对韦斯咸一役受伤，需要开刀长抖数个月，情况同迪亚高祖达相似。

葡萄牙现时锋线上常规主力得番C朗、祖奥菲历斯，庆幸系23岁新星拉菲尔利亚奥近年表现出色，上季协助AC米兰夺得意甲冠军，自己亦当选意甲最佳球员，佢今季意甲上阵9场入4球，状态勇猛。

值得一提，拉菲尔利亚奥今届金球奖排14位，仲高过C朗，可见此子潜力优厚，有望喺今届世界盃发光发热。