曼联同C朗拿度嘅童话故事面临悲情结局，随住C朗喺周四(20日)对热刺一仗提早离场，曼联周五(21日)凌晨发出声明，宣布唔会将C朗纳入周日(23日)作客车路士嘅大军名单。据报曼联领队坦哈格对C朗嘅行为已忍无可忍，除内部停赛外，亦禁止佢同一队操练，消息指坦哈格表明1月要踢走C朗，甚至考虑同佢提前解约！

曼联主场2比0赢热刺一仗，做後备嘅C朗被影到喺完场前4分钟自己返入更衣室，原本以为佢系不满冇份入替，但据《每日邮报》报道，C朗当时系拒绝坦哈格要佢入替嘅指令，而且赛後当全队庆祝紧胜利，C朗已经独自离开奥脱福球场。C朗喺季前热身已有类似行为，当时坦哈格就公开表示「不能接受」。

曼联嘅声明只系话C朗唔会参与同车路士嘅大战，不过英国《太阳报》报道，曼联已勒令C朗要单独操练，而且面临2星期人工罚款(约72万镑)，消息指坦哈格今次行动系得到球会支持。据报坦哈格决心1月将C朗踢走，如果唔能够卖出，就算赔钱同C朗提早半年解约亦在所不惜。

面对曼联重罚，C朗随後亦发出声明，但就唔肯正面回应事件，亦冇就自己行为作出道歉，只系强调自己20年职业生涯一直尊重团队、希望成为模范球员，只系轻轻带出「不幸有时会被一时嘅情绪冲昏头脑」，强调自己会努力练波、支持队友、准备好每一场比赛，最後表示：「我哋好快会再一齐。」